Viðutan

12. júní 2007

Á morgun hefst inntökuprófið inn í læknadeildina og verða prófin 3 á morgunn og annað eins á fimmtudaginn.  Vona að Kötunni gangi vel, hún á það sannarlega skilið.

Búin að vera óttalega viðutan síðustu daga, var að muna allt í einu eftir símtali sem ég ætlaði að hringja síðasta föstudagsmorgunn til Systu mágkonu! Er greinilega ekki í lagi en ýmiss atriði hafa farið forgörðum undanfarið :(   Verð að taka upp dagbókina, það er greinilegt. Hringja auðvitað í Systu! Hvað skyldi hún halda, hm……….?????

Dagurinn fór í alls slags stúss vegna dánarbúsins, ótrúlegt hve viðmót starfsmanna í bönkum getur verið kaldranalegt. Þessi mál taka á og eru tímafrek, ekki hjálpar “Hrollauga” upp á. En smátt og smátt er þetta að koma.  Mér finnst að eftirlifandi makar ættu að eiga kost á námskeiði eftir fráfall hins makans, svo mikið er torfið og kerfið þungt í vöfum. Allt rifjast auðvitað upp og ýfist, það tekur svolítið á.

Staflinn á eldhúsborðinu lækkar smátt og smátt og ég farin að ná fleiri, settum markmiðum en áður. Nú er bara að krossleggja fingur og vona að allt fari á besta veg. Framundan er áframhaldandi pappírsvinna, fundarhöld og heimsókn á Skagann til að hitta minn skólameistara.  Svei mér ef lífið er ekki að taka á sig eðlilega mynd á ný :)

Vona að Kötunni gangi vel á morgunn, Haffa farið að líða betur í 30°C hitanum og próflestrinum en stóra prófið hans í lífefnafræðinni er þann 22. júní. Allt er þetta að hafast :)

Vangaveltur, Sorg og Veikindin


2 ummæli við „Viðutan“

  1. Kata ritaði:
    13. júní 2007 kl. 8.20

    Allt hefst þetta að lokum kærar sys.
    Bestu kveðjur til nöfnu og vona að henni gangi vel í inntökuprófinu og sömuleiðis góðar kveðjur til Haffa
    Vona að sveitin hafi tekið vel á móti þér þó ferðin hafi verið erfið, en allt er þetta hluti af því ferli sem menn ganga í gegnum eftir erfiðleika sem hafa á þig herjað. Þú ert sterk og þó þú bognir brotnar þú ekki!

    Kv. að vestan
    Kata sys
    p.s. bíð spennt eftir bókinni:)

  2. Guðrún Jóna svaraði:
    13. júní 2007 kl. 21.34

    Takk fyrir hvatningaorðin kæra sys, ekki veitti mér af þeim.
    Allt er þetta að koma þó. Bókin, já; ég verð sennilega í vandræðum með að takmarka mig í þeim efnum, kannski þetta verði bara framhaldssaga:)
    Nafna þín búin með fyrri prófdaginn, sá seinni er á morgun. Haffi á kafi en vonast til að geta tekið síðasta prófið 22. júní þó það sé naumur tími. Sjáum til, þau biðja bæði að heilsa
    Bestu kveðjur vestur
    Gunna